top of page
sin%2520fondo_edited_edited.png

Hestoria d'un gaiteru

     Daniel Álvarez Mora naz un 25 d’Abril del añu ´83 n'Uviéu.

La so pasión pola música vien dende bien ceo pela parte materna. El so güelu Antonio, yera clarinetista y gran amante de la música.

Dani entama a tocar la gaita asturiana en Mieres, a la edá de 7 años de la mano del Mayestru Gaiteru José Ángel Hevia. Al añu siguiente, entamó los estudios reglaos na Escuela Municipal de Música de Mieres, escoyendo'l clarinete como instrumentu, n'homenaxe al so recién fináu güelu, al empar qu'entama a formar parte de la Banda Gaites Mieres del Camín, cola qu’a lo llargo de los años recuerre gran parte de la xeografía asturiana, del Estáu Español y Países como Irlanda, Italia y Bretaña Francesa, tamién collaborando en dellos conciertos del cantante Victor Manuel y del dúu Amistades Peligrosas, exerciendo en sucesives actuaciones de director musical y pasando a selo oficialmente, ente los años 2013 y 2015. Con esta banda y otres cuatro más, Hevia formó la Bandona d'Asturies, na que por separtao alcuéntrense les bandes, B.G. Villaviciosa "El Gaitero" (de la que foi direutor de 2017 a 2021 y productor musical de los sos espectáculos XXV Aniversariu, añu 2011 y Espectáculu PUEYES, añu 2016), B.G. Mieres del Camín, B.G. CandásB.G. Ribeseya y B.G. Rei Aurelio, nes que nestes dos caberes tamién fexo llabor de direutor musical en delles vegaes.

Nel añu ´96 algama’l tercer puestu nel "Memorial Remis Ovalle" pa solistes de gaita asturiana, pasando asina a la final que tien llugar nel Festival Interceltique de Lorient (Concursu Macallan), onde se clasifica como Subcampeón.

Tamién tien participao nel Concursu y Muestra de Folclor "Ciudá d’Uvieu", tantu na modalidá pa Gaiteros Solistes, como na de Bandes de Gaites, siendo finalista nesta cabera, nos años '93 y '94.

Nos años '98-2002, foi ún de los gaiteros acompañantes nes xires de promoción del so Mayestru Hevia, onde percorrió países como Chile, Arxentina, Italia, Suiza, Portugal, Bélxica, Finlandia y Xapón.

     Dio los sos primeros pasos nel mundiu'l Folk, col Grupu Forgaxa d’Uxu (Mieres) nel añu '98. 

Nel añu 2002 entamó a tocar col grupu folk ayerán Tarañu como flauteru autodidacta, pasando per importantes Nueches Celtes de la rexón y pelos Paises Bélxica y Italia. Amás, con esta agrupación, tien participao en dellos concursos de grupos folk como, "El Cuartu Los Val.les" en Navelgas y el "Jamesons Celtic Fest" nel Pub Onneill´s de Madrid.

Nesti mesmu añu ingresa tamién nel grupu Gueta na Fonte, presentando esti proyeutu en gran parte de la xeografía española y nos Países Alemania y Polonia, lo que años dempués derivó a la hoi llamada Orquesta Céltica Asturiana.

Nel cursu 2004/05 foi mayestru de Gaita nes actividaes extraescolares del Colexu Públicu de Cabañaquinta (Conceyu d´Ayer). Dende 2011 forma parte del profesoráu de la Escuela de Música Tradicional de Villaviciosa, siendo mayestru de gaita y flauta de madera.

Nel añu 2005, como nuevu gaiteru de Llangres, fexo una xira de Branu per Suiza, Italia y Andorra presentando "Esnalar", el segundu trabayu discográficu del grupu.

A principios del añu 2006 entama como flauteru nel grupu ribeseyanu Corquiéu, col que participa en grandes festivales en Normandía, Bélxica, Bretaña Francesa y Escocia, nel Celtic Connections, onde tamién fexo un mini-conciertu a dúu col gaiteru José Manuel Tejedor, nel Tributu al fináu gaiteru escocés Gordon Duncan.

Participa tamién n’otros proyeutos como el dúu DANIS xunto col guitarrista Dani Díez, col que años más tarde, nun viaxe fugaz a un pequeñu festival nun pueblu mineru del País de Wales, iguan una bandina xunto a Miguel A. Fdez. y Antón Barquero, que los lleva a formar un grupu a la vuelta del viaxe baxo'l nome DEGAÑAN'S, col que participaren nun bon piñu de festivales y nueches folk.

Tuvo faciendo llabor de flauteru nes presentaciones de "Entamu", el primer trabayu del grupu Blima, onde lu llevó hasta Estonia nel añu 2009 al "Viljandi Folk Festival".

En 2011 entama la so andadura como bouzoukista del grupu Duerna, de los que foi co-productor del so segundu discu "A Mansalva", que foi el premiu por facese col Ier puestu nel concursu de grupos folk "Escenario prau" en Cantabria.

Tamién pertenez a grupos de folk basaos na reellaboración de música tradicional d’otros países del Arcu Atlánticu colos que participa nos programes de Música na cai, contratáu pola Fundación de Música Moderna d´Avilés.

D'esta xera y dende 2012, pertenez como bodhraneru, al grupu P'amusquis de Ribeseya, siendo'l que sustituye al desapaecíu David Mateos "Puru".

Nel añu 2014 ingresa como multi-instrumentista nel Tríu Corzobeyos y nuna nueva formación con músicos d'El Bierzo, baxo'l nome Café Plomé, faciendo música "astur-berciana".

Más alantre, adentrándose nel mundiu de los coros, ye bouzoukista acompañante na Tertulia Peña Careses, formación dedicada especialmente a reellaborar los denominaos cantares de chigre.

Más tarde entra a formar parte como bouzoukista del grupu Alienda, col qu'algama nel añu 2015, el segundu puestu nel concursu de grupos folk "Proyecto bígaru" que se cellebra nel Festival Folkomillas en Cantabria.

Nel añu 2018, surde la idea de formar un tríu col enfotu de dar una vuelta más a la renovación de la tonada, al llau del cantante Odón del Paganéu y el guitarrista Luis Nicolás, col nome, Figos de Tuna. Poco más tarde entra a formar parte del conocíu grupu l.lacianiegu, D'urria como flauteru.

A lo llargo de la so carrera, tien collaborao en más de 50 trabayos discográficos y una montonera conciertos con dellos de los artistes más destacaos de la música folk, rock, etc, como son:

     

Nel añu 2008 finó el Grau Profesional de Música, pola especialidá de Flauta Travesera nel Conservatoriu Profesional del Valle del Nalón (Sama Llangréu) y anguaño ta acabante titulase pola especialidá de Gaita, nel Conservatoriu "Anselmo González del Valle" (Uviéu) con Premiu Fin de Grau.

Nel añu 2009 algama´l PREMIU AMAS na estaya "Otros Instrumentos" y nel 2011 el AMAS a Meyor discu Folk "SUAÑA" y Meyor canción Folk "Bratislava" con Corquiéu. Nel pasáu 2020 repite premiu a meyor canción Folk col tema "Murniu cantar".

Aparte de les sos especialidades en gaita y flauta, interésase tamién por otros instrumentos como la gaita irlandesa (uilleann pipe), la gaita galega, el bouzouki, la guitarra acústica n'afinación DADGAD, los teclaos y delles percusiones (tambor tradicional, caxa d'alta tensión, bodhran, caxón, etc).

1640032799330.png
1640025993943.png
1640031772871.png
bottom of page