¡Entamando l'añu 2020 con bones noticies!
L'añu pasáu, con motivu d'ún concursu de cantares fechos n'asturianu polos escolinos y mayestros de dellos colexos d'Asturies, asoleyose un discu compilatoriu de varios artistes versionando los cantares ganadores. Foi too una aventura.
Estefanía Moro Montequín, entusiasta de tolo que tenga que ver cola cultura d'Asturies, enfotada siempres n'alcontrar la motivación pa los sos neños de llingua asturiana, presentó na menos que trés. Lletra propia y en dos d'ellos, tamién con música de coyecha propia. Había que facer una maqueta pa presentalos al que diba a ser el xuráu marcáu pola Rede de normalización llingüística nos conceyos.
La aventura empecipió col discurrir de lletres y música. Esi apartáu dexámoslu pa que lu cuente ella. Anque a min tamién me tocó facer llabor. Llueu vieno'l procesu de grabación.
El milagru de les tecnoloxíes d'anguaño fai que pueas facete con un editor (DAW) de audiu nun smartphone. Grabamos a los escolinos dende'l teléfonu canciando, con lletra en mano.
Dempués vieno el procesu de edición nel "home estudiu", faciendo les llabores d'ecualización, grabación de dellos instrumentos qu'aportaren un pocu color musical, y delles correiciones pistes, voces, etc.
Dempués de presentáu cuasique nel caberu día de plazu, el fallu del xuráu dio por bonos non sólo ún de los temes presentaos, sinon los trés.
Ellos mesmos fixeren la escoyeta de los grupos que diben facer les versiones. Ún de los grupos escoyíos foi Corquiéu col tema Murniu cantar. Un tema nel que la lletra aporta muncha hestoria.
Gracies a Fani, a la Rede de normalización llingüística nos conceyos por tenenos en cuenta, a los escolinos de los Colexos, Carbayín Baxu y El Cotayu, a los mandos de Sergio Rodríguez y Sergio Díaz de los Estudios TUTU por trabayar rápidu y perbien y a la familia Corquiéu por dar esi toque tan personal al tema.
La xuntura de too esto ye'l resultáu y reconocimientu pa esta nominación a los Premios AMAS na estaya Mejor canción Folk. ¡GRACIES!
Ponemos l'enllaz pa que lu podáis sentir: