Ún instrumentu al que pues abrazar cuando andes faltu de ciñu, ye lo más valioso que se puede atopar. Esti mes de Marzu fai 30 años qu’entamé con esto de la música; con esi instrumentu: La Gaita.
...¡¡quién me lo iba dicir!! cuando con escosos 4 años, garraba aquel xuguete tan raru con trés palos y una bolsa tela roxa que los xunía y había qu'inflalu pa que sonare (sí, pensáis bien, yera la típica gaita de recuerdu de Cuadonga, pero nesti casu trayía por mis padres dende Vigo)...¿Podéis creyer que-y tenía miéu?¿podéis creyer que cada 11 de payares que xubíamos a la fiesta de Samartín de Morea a comer les fabes a cá mío güela (y sigo diendo, les tradiciones caltiénense) nun yera capaz a sentir una gaita a menos de 200 metros? La gaita non, pero el tambor lo que más. Estrocé bien de caxes de cartón a golpe de bolígrafu.
¡Pa burru yo!
El masoquismu y la psicoloxía inversa d'aquellos tiempos, pudieren conmigo. Salió un anunciu en periódicu d'ún rapaz de Villaviciosa que ponía clas de gaita nel polideportivu d'Oñón, en Mieres. Yera un tal José Ángel Hevia. La nuestra vecina Aurora picó en casa a dicínoslo y los xefes nun duldaron en probar a apuntame a ver qué pasaba si el so fíu decidía dexalos sordos de por vida.
Equí entamó la hestoria:
Marzu del 1991. Finó la paz naquel edificiu.
La primer actuación de la mio vida musical y nel mio pueblu,
El prau del molineru (Sta Cruz de Mieres 1992) nes fiestes de la Cruz de Mayu.
Abondes y fonderes gracies a tolos que tuvistis táis y taréis ehí, y que compartistis escenarios, furgonetes, llocales d'ensayu, jam sessions, grabaciones y dalgún culín de sidra qu'otru. Por suerte nun sois pocos y dalgunos apaecístis pa quedavos.
¡¡¡POR OTROS 30 AÑOS SONANDO!!!
Nestos tiempos que cuerren, los músicos tenemos que reinventanos como en munchos sectores desfavorecíos. Pa ello discurriose'l tema de compartir pantalla con otros collacios del gremiu mediante vídeos. Apetecíame muncho facelo con ún de los mios ídolos dende fae bien d'años. Compartí vídeu xunto al collaciu Luis Nicolás, col gran flautista, Michael McGoldrick.
Dexo equí l'enllaz y del vídeu de cellebración d'aniversariu que fixe na cuarentena:
Commentaires