Fai dos díes presentábemos esti trabayu. El primer discu d'Odón García, de nome artísticu, "Odón del Paganeu", compañeru dende fai pocu más d'un añu del proyeutu FIGOS DE TUNA xunto con Luis Nicolás.
Un discu de tonada asturiana que ruempe colos estereotipos de cualisquier discu de la nuestra canción asturiana por excelencia,
partiendo con un diseñu cenciellu al empar qu'orixinal, onde remarca les partes del cuerpu humanu que se usen pa proyectar la voz, que ye a la fin, el so instrumentu musical. Tamién fai pa con ello una dedicatoria a tolos profesionales y científicos de la melicina, que faen perbona llabor en delles vegaes.
Un discu en solitariu pero faciendo hincapié nos sos proyeutos musicales paralelos.
Asina ye, que nos fizo partícipes pal so diseñu vistiéndonos a toos como profesionales de la melicina, nun simulacru d'intervención quirúrxica, y salimos tal que asina:
Sonia Fidalgo, Fran Pola, Pepín de Muñalén, Ana Quesada, Emma Zuazua, Nel de Purnea, Luis A. Pola, Matías García, Dani Álvarez, Luis Nicolás, Sergio Díaz y el propiu protagonista como paciente.Con Figos, collaboremos en dos de los temes del discu, que pertenecen al repertoriu del nuestru proyeutu en tríu.
La presentación con fin íntimu, acoyedor y orixinal, foi nel Espacio Circus n'Uviéu. Un sitiu con encantu onde se pudo facer música, sentila, y sobretoo reir cola sorna y guasa ñatural d'Odón. Una tardi prestosa.
Un trabayu pervariáu, y con munches sorpreses pa los oyíos, cola voz envolvente del nuestru compañeru, como protagonista.
¡¡¡NUN DEXÉIS DE SENTILU!!!